«Pari Sen-Jermen» bosh murabbiyi Luis Enrike 2025/26-yilgi mavsum yakunlari bo‘yicha «Oltin to‘p»ga da’vogar bo‘lishi mumkin bo‘lgan futbolchi haqidagi savolga javob berdi va o‘z jamoasidan bir o‘yinchini alohida ta’kidladi.

«Vitinya har doimgidek ajoyib o‘ynadi. U keyingi «Oltin to‘p» da’vogarimi? Nima desam ekan… Umid qilamanki, shunday bo‘ladi», — deya Enrike so‘zlarini jurnalist va insayder Fabrisio Romano X ijtimoiy tarmog‘ida keltirdi.

Eslatib o‘tamiz, Chempionlar Ligasi umumiy bosqichi 5-turida «Tottenhem»ga qarshi o‘yinda portugaliyalik Vitinya xet-trik qayd etgandi. Uchrashuv 5:3 hisobi bilan yakunlandi. Joriy mavsumda Vitinya barcha musobaqalarda jamoa tarkibida 25 ta o‘yinda maydonga tushib, 6 ta gol urdi va 10 ta golli uzatma muallifi bo‘ldi.