«Liverpul» himoyachisi Virjil van Deyk jamoaning so‘nggi o‘yinlardagi omadsiz natijalari fonida klub muxlislariga murojaat qildi.

«Biz bu mavsumdagi eng og‘ir pallalardan birini boshdan kechiryapmiz, lekin buni yengib o‘tamiz. Men bu jamoaga yuragimdan ishonaman. Bizga hech narsa osonlikcha berilmaydi — hammasi uchun kurashamiz, bu vaziyat ham istisno emas. Biz taslim bo‘lmaymiz. Har bir sinov — imkoniyat. Biz birga o‘sishimiz, bir-birimizga yordam berishimiz va o‘z kuchimizni ko‘rsatishimiz kerak. Muxlislar, bizni qo‘llab-quvvatlashda davom eting. Bizga hozirgidan ko‘ra ko‘proq birdamlik kerak», — deya Van Deykning so‘zlarini klubning rasmiy sayti keltiradi.

26 noyabr, chorshanba kuni «Liverpul» chempionlar ligasi umumiy bosqichi 5-turida PSVga 1:4 hisobida yutqazib, barcha musobaqalarda uchinchi marta ketma-ket mag‘lubiyatga uchradi. Undan avval jamoa Angliya chempionatida «Manchester Siti» (0:3) va «Nottingem Forest» (0:3)ga yutqazgan edi.