«Ливерпуль» ҳимоячиси Виржил ван Дейк жамоанинг сўнгги ўйинлардаги омадсиз натижалари фонида клуб мухлисларига мурожаат қилди.

«Биз бу мавсумдаги энг оғир паллалардан бирини бошдан кечиряпмиз, лекин буни енгиб ўтамиз. Мен бу жамоага юрагимдан ишонаман. Бизга ҳеч нарса осонликча берилмайди — ҳаммаси учун курашамиз, бу вазият ҳам истисно эмас. Биз таслим бўлмаймиз. Ҳар бир синов — имконият. Биз бирга ўсишимиз, бир-биримизга ёрдам беришимиз ва ўз кучимизни кўрсатишимиз керак. Мухлислар, бизни қўллаб-қувватлашда давом этинг. Бизга ҳозиргидан кўра кўпроқ бирдамлик керак», — дея Ван Дейкнинг сўзларини клубнинг расмий сайти келтиради.

26 ноябр, чоршанба куни «Ливерпуль» чемпионлар лигаси умумий босқичи 5-турида ПСВга 1:4 ҳисобида ютқазиб, барча мусобақаларда учинчи марта кетма-кет мағлубиятга учради. Ундан аввал жамоа Англия чемпионатида «Манчестер Сити» (0:3) ва «Ноттингем Форест» (0:3)га ютқазган эди.