Madridning "Atletiko" klubi yarim himoyachisi Konor Gallaxer yanvar oyidayoq "Manchester Yunayted"ga o‘tishi mumkin. Klub uning transferi uchun narx belgiladi. Ispan klubi taxminan 30 mln yevro olishni istamoqda.
"Menimcha, Gallaxer qishda yoki yozda "Atletiko"ni tark etish imkoniyatiga ega. Hammasi bitim shartlariga bog‘liq bo‘ladi. Avgust oyi oxirida unga "Manchester Yunayted" qiziqish bildirgandi, ammo o‘shanda "Atletiko" ijaradan voz kechgandi. Agar to‘laqonli transfer bo‘yicha taklif tushsa, vaziyat o‘zgarishi mumkin. Manbalar ma’lumotiga ko‘ra, 30 mln yevro atrofidagi narx Gallaxerni yanvarda sotib olish uchun oqilona variant hisoblanadi," - deya ma’lum qildi insayder Fabrisio Romano.
Konor Gallaxer 2024 yilning yozida 39 million yevro evaziga "Atletiko"ga o‘tgandi. Joriy mavsumda angliyalik futbolchi madridliklar safida bor yo‘g‘i uchta o‘yinda asosiy tarkibda maydonga tushdi.
