"Manchester Yunayted" yarimhimoyachisi Kobbi Maynuga "Bavariya" qiziqish bildirmoqda.
"Qizil iblislar" bosh murabbiyi Ruben Amorim 20 yoshli xavbekni jamoasining asosiy tarkibida ko‘rmayapti, shu bois inglizning ketishi haqidagi mish-mishlar joriy yilning yozidan buyon tinmayapti.
United Zone xabariga ko‘ra, mankunianliklar tarbiyalanuvchisi uchun nafaqat Italiyaning "Napoli," balki Germaniyaning "Bavariya" klubi ham da’vogarlik qilmoqda. Biroq, "MYU" qishki transfer oynasida futbolchi bilan xayrlashmoqchi emasligini bir necha bor ma’lum qilgan.
Ma’lumki, Kobbi Maynuning o‘zi o‘yin amaliyoti uchun ijaraga ketishni xohlaydi. Transfermarkt saytidagi futbolchining taxminiy narxi - 45 mln yevro.
