"Barselona" sport direktori Deku jamoa bosh murabbiyi Xans-Diter Flik haqidagi savolga javob berdi.
Germaniyalik murabbiy "ko‘k-anorranglilar" boshqaruvida ikkinchi mavsumini o‘tkazmoqda. Mutaxassis qancha vaqt davomida bu lavozimda ishlamoqchi ekani hozircha noma’lum.
"Flik klubimizda juda baxtli, ammo "Barselona"da ishlash ancha qiyinligini bilamiz, har bir mayda-chuydaga katta e’tibor qaratiladi. Xansi juda hissiyotli va insonparvar, lekin u har doim ham hamma narsani nazorat qila olmaydi," - deya Dekuning so‘zlarini keltiradi Barca Universal.
"Barselona" La Liga 15-turidan keyin turnir jadvalida peshqadamlik qilmoqda va Madridning "Real" klubini 1 ochkoga ortda qoldirmoqda. O‘tgan mavsumda kataloniyaliklar ichki arenadagi barcha sovrinlarni qo‘lga kiritgandi.
