"Барселона" спорт директори Деку жамоа бош мураббийи Ханс-Дитер Флик ҳақидаги саволга жавоб берди.
Германиялик мураббий "кўк-анорранглилар" бошқарувида иккинчи мавсумини ўтказмоқда. Мутахассис қанча вақт давомида бу лавозимда ишламоқчи экани ҳозирча номаълум.
"Флик клубимизда жуда бахтли, аммо "Барселона"да ишлаш анча қийинлигини биламиз, ҳар бир майда-чуйдага катта эътибор қаратилади. Ханси жуда ҳиссиётли ва инсонпарвар, лекин у ҳар доим ҳам ҳамма нарсани назорат қила олмайди," - дея Декунинг сўзларини келтиради Barca Universal.
"Барселона" Ла Лига 15-туридан кейин турнир жадвалида пешқадамлик қилмоқда ва Мадриднинг "Реал" клубини 1 очкога ортда қолдирмоқда. Ўтган мавсумда каталонияликлар ички аренадаги барча совринларни қўлга киритганди.
