"Liverpul" hujumchisi Muhammad Saloh APL 15-turidan o‘rin olgan "Lids"ga qarshi o‘yindan (3:3) so‘ng keskin bayonot bilan chiqdi.

«Juda xafaman. Bu klub uchun qancha mehnat qilganimni hamma ko‘rib turibdi — yillar davomida, ayniqsa o‘tgan mavsumda. Zaxira o‘rindig‘ida qoldirilish esa… nega bunday bo‘lganini bilmayman.

Men ko‘p marta bosh murabbiy bilan munosabatim yaxshi ekanini aytganman. Hozir esa munosabat qolmadi. Nima uchun bunday bo‘lganini bilmayman.

Rostini aytsam, bu men uchun qabul qilib bo‘lmaydigan holat. “Mo — muammo, demak uni chetga surib qo‘yish kerak” - lekin men o‘zimni muammo deb hisoblamayman.

Kecha onamga telefon qildim. U mening bugun asosiy tarkibda tushmasligimni bilmasdi, men esa bilardim. Unga: “Braytonga qarshi o‘yinga kelaver, o‘ynasam ham, o‘ynamay qolsam ham farqi yo‘q — baribir zavq olaman”, dedim.

Axir o‘yin "Enfild"da bo‘ladi. Bu Afrika Millatlar Kubogiga ketishimdan oldingi hayrlashuvim bo‘ladi»

Klub yozda katta va’dalar bergandi, endi esa uch o‘yinda maydonga tushirilmadim. Ular va’dasida turishdi deya olmayman.

Menimcha, boshqa kimdir bilan bu sodir bo‘lganda, klub yonini olgan bo‘lardi. Men bilan nega bunaqa bo‘layotgani tushunarsiz.

Men klub uchun borimni berdim. O‘z o‘rnim uchun har kuni kurashishim shart emas, chunki u meniki, unga haqliman.

Bilaman ertaga Karrager chiqib meni tanqid qiladi. Qilaversin.

Kelganimdan beri hech kim menchalik ko‘p gol urmadi, assist qilmadi. Esimda, Harri Keyn o‘n o‘yinda gol urmasa, «Harri gol uradi hali» deyishadi, Salohga kelganda - «u zaxirada o‘tirishi kerak». Uzr, Xarri», - dedi 33 yoshli misrlik superyulduz.

Saloh joriy mavsumda mersisaydliklar uchun jami 19 ta o‘yinda 5 ta gol urib, 3 ta golli uzatma berdi.