"Komo"ning ispaniyalik hujumchisi Alvaro Morata jarohat olib, bir necha oyga safdan chiqdi. Bu haqda insayder Nikolo Skira xabar bermoqda.
Manbaga ko‘ra, 33 yoshli hujumchiga sonning yaqinlashtiruvchi mushaklaridan og‘ir jarohat tashxisi qo‘yilgan. Futbolchi mart oyida maydonga qaytishi kutilmoqda.
Joriy mavsumda Morata barcha turnirlar bilan hisoblaganda 15 ta uchrashuvda maydonga tushdi va o‘z hisobiga bitta assist yozdirib qo‘ydi.
Eslatib o‘tamiz, Morata joriy mavsumni "Komo"da ijara asosida o‘tkazmoqda. Futbolchining shartnomasi "Milan"ga tegishli.
15 dekabr kuni "Komo" Italiya chempionatining 15-turida safarda "Roma"ga qarshi bahs olib boradi.
