«PSJ»ning sobiq futbolchisi Tyago Silva parijliklar safida to‘p tepgan davrida hujumchilar Kilian Mbappe va Neymar o‘rtasida yuzaga kelgan munosabatlar sovishi haqida fikr bildirdi.
— «PSJ»da Mbappe va Neymar boshida juda yaxshi chiqishardi, ammo vaqt o‘tishi bilan ularning munosabatlari yomonlashib ketdi. Nima uchun? Bu chiroyli tarix edi. Men «Monako»ga qarshi Superkubok o‘yinini yaxshi eslayman. Uchrashuvdan keyin Mbappe oldimga kelib: “Hatto Neymar shartnoma imzolasa ham, men ham shu jamoaning bir qismi bo‘lishni xohlayman. Agar imkoniyat bo‘lsa, prezident bilan gaplashib ber…” degandi.
Ularning munosabatlari ajoyib edi. Ular juda yaqin edi, har kuni eng ko‘p kulgan ham aynan shu ikkisi bo‘lardi. Nima uchun bir-biridan uzoqlashib ketishganini hech qachon tushunmadim. Men o‘sha paytda allaqachon «PSJ»da emas edim, shuning uchun ajralishga kim sabab bo‘lganini bilmayman, ammo bu menga alam qildi. Ular ikkalasi ham ajoyib yigitlar, va barchasi aynan shunday yakunlangani juda achinarli», — deya Silvaning so‘zlarini Goal keltiradi.
Eslatib o‘tamiz, Neymar «PSJ»ni 2023 yilda, Mbappe esa 2024 yilda tark etgan.













