Superliga pley-off bosqichidan o‘rin olgan «Aral» – «Buxoro» uchrashuvi 0:1 hisobida yakunlandi. O‘yindan keyingi matbuot anjumanida buxoroliklar bosh murabbiyi Aleksandr Xomyakov ishtirok etdi.

— O‘yin haqidagi fikringiz…

— Barcha buxorolik muxlislarni jamoa Superligada qolgani bilan tabriklayman. Buning uchun biz qiyin yo‘lni bosib o‘tdik. Nukusga bitta jamoa bo‘lib keldik va maqsadimiz g‘alaba qozonish edi. Kichik hisobda zafar quchdik va eng muhimi, oldimizga qo‘yilgan vazifani uddaladik.

— «Buxoro» deyarli butun o‘yinni nazorat qildi. Ushbu uchrashuvga tayyorgarlik qanday olib borildi?

— Psixologik tomondan katta bosim bor edi va, avvalo, shu bosimni yengib o‘tishimiz lozim edi. Tayyorgarlikni esa odatdagidek olib bordik. Mashg‘ulotlarda alohida ish qilmadik, faqat mavsumning eng oxirgi o‘yini bo‘lgani uchun futbolchilarning jismoniy holatini ushlab turishga harakat qildik. Mavsum davomida bir qancha o‘yinlar o‘tkazdik — g‘alabali ham, qiyin uchrashuvlar ham ko‘p bo‘ldi. Ushbu mavsum uchun barchaga rahmat aytaman.