"Barselona" prezidenti Joan Laportaning maslahatchisi Enrik Masip klubning Madridning "Atletiko" klubi hujumchisi Xulian Alvaresga qiziqishi haqida gapirdi.
Argentinalik futbolchi uzoq vaqtdan buyon "ko‘k-anorranglilar"ning transfer maqsadlaridan biri sifatida tilga olinib kelinmoqda, biroq hujumchining narxi yuqoriligi tufayli bu kelishuv amalga oshishi dargumon.
"Alvares - ajoyib futbolchi, ajoyib to‘purar. U bu mavsumda "Atletiko" safida ajoyib o‘yin ko‘rsatmoqda. Prezident Laporta "Barsa" istagan futbolchisini qo‘lga kiritishi mumkinligini aytgandi. Amalga oshirgan ishlarimizning natijalarini hisobga olsak, bu haqiqatan ham shunday ekanligiga shubham yo‘q. Klub bunday kelishuvni amalga oshira oladi", - deya Masipning so‘zlarini keltiradi Barca Universal.
Transfermarkt portali Xulian Alvaresning narxini 100 mln yevroga baholamoqda.
