«Bavariya» hujumchisi Xarri Keyn Bundesliganing 15-turi doirasida «Xaydenxaym»ga qarshi o‘yinda (4:0) gol urib, Germaniya chempionatida yangi rekord o‘rnatdi. Bu haqda myunxenliklar klubining rasmiy sayti xabar berdi.

Shu tariqa, britaniyalik futbolchining Bundesligada «gol+pas» tizimi bo‘yicha jami 100 (81 gol + 19 assist) ochkosi mavjud. Ushbu ko‘rsatkichga yetish uchun Keynga 78 ta o‘yin kifoya qildi — bu esa 2004/2005 yilgi mavsumdan buyon statistika yuritila boshlaganidan beri eng yaxshi natija hisoblanadi. Ilgarigi rekord Aryen Robbenga tegishli bo‘lib, u bunga 119 ta o‘yinda erishgan edi.

Xarri Keyn «Bavariya»ga 2023 yil yozida «Tottenxem»dan ko‘chib o‘tgan. Joriy mavsumda u Bundesligada myunxenliklar safida 15 ta o‘yin o‘tkazib, 19 ta gol urdi va 3 ta golli uzatma amalga oshirdi. Chempionlar ligasida Keyn 6 ta bahsda maydonga tushib, 5 ta gol muallifi bo‘ldi. Shuningdek, Germaniya Kubogida 5 ta, mamlakat Superkubogida esa 1 ta gol uning hisobida bor.