«Бавария» ҳужумчиси Харри Кейн Бундеслиганинг 15-тури доирасида «Хайденхайм»га қарши ўйинда (4:0) гол уриб, Германия чемпионатида янги рекорд ўрнатди. Бу ҳақда мюнхенликлар клубининг расмий сайти хабар берди.

Шу тариқа, британиялик футболчининг Бундеслигада «гол+пас» тизими бўйича жами 100 (81 гол + 19 ассист) очкоси мавжуд. Ушбу кўрсаткичга етиш учун Кейнга 78 та ўйин кифоя қилди — бу эса 2004/2005 йилги мавсумдан буён статистика юритила бошлаганидан бери энг яхши натижа ҳисобланади. Илгариги рекорд Арьен Роббенга тегишли бўлиб, у бунга 119 та ўйинда эришган эди.

Харри Кейн «Бавария»га 2023 йил ёзида «Тоттенхэм»дан кўчиб ўтган. Жорий мавсумда у Бундеслигада мюнхенликлар сафида 15 та ўйин ўтказиб, 19 та гол урди ва 3 та голли узатма амалга оширди. Чемпионлар лигасида Кейн 6 та баҳсда майдонга тушиб, 5 та гол муаллифи бўлди. Шунингдек, Германия Кубогида 5 та, мамлакат Суперкубогида эса 1 та гол унинг ҳисобида бор.