"Real" vingeri Vinisius Junior muvaffaqiyatsiz o‘yinlari va muxlislarning salbiy munosabatlariga qaramay, xotirjamlikni saqlamoqda.
Ketma-ket 17ta o‘yinda gol ura olmayotgan 25 yoshli futbolchi La Liga doirasida "Sevilya"ga qarshi o‘yinda (2:0) zaxiraga olinganidan so‘ng jamoa muxlislari unga nisbatan hushtakbozlik qilishdi. Futbolchi "qaymoqranglilar" futbolkasi bilan tushgan suratini o‘chirib tashladi va instagramda ko‘p nuqta qoldirdi. "Real" bosh murabbiyi Xabi Alonso: "Muxlislar o‘z fikrini bildirishga haqli," - dedi.
AS nashri xabariga ko‘ra, Vinisius xotirjam, u mavsumning birinchi qismidagi shiddatli o‘yinlardan keyin kuchini tiklash uchun o‘yinlar orasidagi tanaffusdan foydalanmoqda.
Futbolchi o‘zining eng yaxshi fazilatlarini mavsumning ikkinchi qismida - bevosita JCH-2026 oldidan va "Real"ning muhim o‘yinlarida namoyish etishiga ishonmoqda.













