O‘zbekiston U-21 terma jamoasi bosh murabbiyi Ravshan Haydarov Osiyo kubogi oldidan matbuot anjumanida ishtirok etdi.

Tayyorgarlik haqida

— 7 dekabr sanasidan boshlab Toshkentda Osiyo kubogi oldidan dastlabki o‘quv-mashg‘ulot yig‘inlarini olib bordik. 28 nafar futbolchilarni jalb etib, mashg‘ulotlar o‘tkazdik. Futbolchilar har xil mavsum o‘tkazishdi, kimdirlar yig‘inga kechroq yetib keldi, umuman olganda, barchaning imkoniyatlarini ko‘rib, sinovdan o‘tkazib bordik.

Yig‘inning keyingi qismi Qatarda davom ettiriladi. U yerda ham Iordaniya va Qatar U-23 terma jamoalariga qarshi so‘nggi nazorat o‘yinlarini o‘tkazamiz. Shunday keyin Osiyo kubogiga yo‘l olamiz.

Olimpiya yoshidagi futbolchilar haqida

— Murabbiylar kengashi, shuningdek, avvalgi tajribalarimizdan kelib chiqqan holda musobaqada 2005, 2006 va undan kichik futbolchilar (Olimpiya yoshi) bilan ishtirok etishni maqsad qilganmiz. Bu albatta sinovdan o‘tgan tajriba, avvalgi turnirlarda ham shu tizimda ishtirok etdik.

2003 va 2004 yillarda tug‘ilgan futbolchilar hozirda klublarida o‘z o‘rnini topishgan, Osiyo kubogida chempion bo‘lishdi, Jahon chempionatida o‘ynashdi. Qolaversa, ular MTJ ga ham jalb etib borilmoqda. Shu sababli, U-23 musobaqasiga 2 yosh kichik futbolchilardan tarkib topgan jamoa bilan boramiz.

Oldinda turgan vazifa haqida

— Albatta, har doim o‘z oldimizga katta maqsad qo‘yamiz. Chunki bu musobaqada reytingimiz ancha baland. Chempion bo‘lganmiz va so‘nggi 2 ta musobaqada finalga chiqdik. Shu sababli ham o‘z oldimizga yuqori maqsad qo‘yib, musobaqaga yo‘l olyapmiz.