Zambiya terma jamoasi hujumchisi Patson Daka golni nishonlash paytida o‘zini deyarli mayib qilib qo‘yishga sal qoldi.
Afrika millatlari kubogi — 2025 musobaqasining 1-turida futbolchi uchrashuvning 90+2-daqiqasida Mali terma jamoasi darvozasiga gol urib, hisobni tenglashtirdi. Golni nishonlash chog‘ida 27 yoshli forvard his-tuyg‘ularini jilovlay olmay, salto qilishga urindi, ammo boshi bilan yerga tikka tushdi. Yiqilgandan so‘ng futbolchi bir muddat gazonda yotib qoldi. Ijobiy jihati shundaki, omadsiz akrobatik harakat jiddiy jarohatga olib kelmadi.
Keyingi uchrashuvda Zambiya terma jamoasi Komor orollari terma jamoasiga qarshi maydonga tushadi. O‘yin 26 dekabr kuni bo‘lib o‘tadi. Uchinchi turda esa jamoa Marokash terma jamoasiga qarshi bahs olib boradi.
Eslatib o‘tamiz, Patson Daka 2021 yildan beri Angliyaning «Lester Siti» klubi sharafini himoya qilib kelmoqda.













