Brunu Fernandesh yana transfer bozoridagi asosiy muhokama mavzusiga aylandi. Xabarlarga ko‘ra, “Manchester Yunayted” sardori kelasi yozgi transfer oynasi oldidan “Real Madrid” rahbariyati tomonidan ehtimoliy variantlardan biri sifatida ko‘rilmoqda.

Madrid klubi markaziy pozisiya uchun yetakchilik xususiyatiga ega futbolchi izlamoqda. Shu nuqtayi nazardan, tajribali portugaliyalik yarim himoyachi “Qirollik klubi” talablariga mos keladigan nomzod sifatida baholanmoqda.

Manbalarga ko‘ra, “Manchester Yunayted” Fernandesh bo‘yicha taxminan 60 million yevrolik taklif tushsa, muzokaralarga ochiq bo‘lishi mumkin. Ushbu summa “Real Madrid”ning transfer siyosatiga mos keladi va futbolchining tajribasini inobatga olgan holda maqbul baho sifatida qaralmoqda.

“Real” rahbariyati Fernandeshning ijodkorligi, pas berish uslubi, uzoq masofadan zarbalari hamda turli taktik sxemalarga moslasha olish qobiliyatini yuqori baholamoqda. U hujumkor yarim himoyachi sifatida ham, markazda yoki orqa pozisiyalarda ham samarali o‘ynay oladi.

Biroq futbolchi 31 yoshda. So‘nggi yillarda qaymoqranglilar asosan yosh va kelajakda qayta sotish imkoniyatiga ega futbolchilarga e’tibor berib kelmoqda. Shunga qaramay, rahbariyat tajribali o‘yinchining yosh futbolchilar uchun muhim tayanch bo‘lishini ham inkor etmayapti.

Hozircha Brunu Fernandesh “Real Madrid” uchun real variant bo‘lib qolmoqda, biroq u asosiy ustuvor nomzod emas. Klub yana bir nechta alternativalarni o‘rganmoqda va yakuniy qaror transfer bozoridagi vaziyat hamda “Manchester Yunayted”ning pozisiyasiga bog‘liq bo‘ladi.

Fernandesh joriy mavsum “Manchester Yunayted” safida barcha musobaqalar doirasida 18 o‘yinda maydonga tushib, 5 ta gol va 7 ta golli uzatma muallifiga aylangan. Transfermarkt portali futbolchining transfer narxini 40 million yevroga baholagan.