Kataloniyaning "Barselona" klubi bosh murabbiyi Xans-Diter Flik jamoaning maqsadlari haqida o‘z fikrlarini bildirdi.
“Bu mavsumda bizning maqsadlarimiz juda katta. O‘tgan mavsumdagi chempionliklar juda chiroyli edi, ammo biz oldinga qarab harakatni davom ettirishimiz kerak. Aynan shuni xohlaymiz.
Bu yil men, murabbiylar shtabim, klub va muxlislar uchun juda ta’sirli va muvaffaqiyatli bo‘ldi. Bu yerda, "Barselona"da boshdan kechirayotganlarim — aql bovar qilmas darajada. Men juda baxtliman. Endi ishlashda davom etishimiz kerak, shunda mavsum oxiri haqiqiy bayramga aylanishi mumkin.
Bu klub meni butunlay o‘zgartirdi. Men bu klubni sevaman, Barselonani sevaman, bu yerda yashaydigan odamlarni sevaman. Bu juda ajoyib. Men butun kuchimni shu klubga bag‘ishlayman.
Biz futbolchilar rivojlanishi va faoliyatida yanada yuqori darajaga chiqishi uchun to‘g‘ri muhit yaratishimiz kerak. Hozir mening butun e’tiborim aynan shunga qaratilgan.
Aynan shu jamoa tufayli odamlar stadionga qayta-qayta kelishni xohlaydi va har bir o‘yinni intiqlik bilan kutadi", - dedi 60 yoshli nemis mutaxassisi.
