"Manchester Siti" bosh murabbiyi Xosep Gvardiola Angliya chempionligi uchun bo‘layotgan kurash haqida o‘z fikrini bildirdi.
Hozirgi vaqtda "shaharliklar" Premyer-liga turnir jadvalida "Arsenal"dan ikki ochko orqada, ikkinchi o‘rinda bormoqda.
"Men hammadan o‘n ochko oldinda bo‘lishni istardim, ammo vaziyat shunday. "Arsenal" juda yaxshi o‘yin ko‘rsatmoqda, lekin biz ham kurashdan chetda emasmiz. Hali dekabrning oxiri xolos. Chempionlar Ligasida ham yuqori pog‘onadamiz, Liga Kubogining yarim finaliga yetib keldik, tez orada Angliya Kubogidagi safar boshlanadi... Ba’zi asosiy o‘yinchilarimiz safga qaytmoqda, shuning uchun ko‘ramiz - qadam-baqadam, o‘yinma-o‘yin harakat qilamiz," - deya Gvardiola jurnalistlarga ma’lum qildi.
O‘tgan mavsumda "Manchester Siti" Angliya chempionatini uchinchi o‘rinda yakunlagan edi.
