“Bornmut” vingeri Antuan Semenyo yaqin 48 soat ichida “Manchester Siti” safiga o‘tishi kutilmoqda. Bu haqda insayder Ben Jeykobs o‘zining X (sobiq Twitter) tarmog‘idagi sahifasida xabar berdi.

Manbaga ko‘ra, 29 dekabr kuni to‘lovlar bo‘yicha o‘tgan ijobiy muzokaralardan so‘ng transfer borasida sezilarli siljish kuzatilgan. Qayd etilishicha, Semenyo “Manchester Siti” bilan shartnoma shartlarini allaqachon og‘zaki tarzda kelishib olgan. Shu bilan birga, futbolchi “Chelsi”ga qarshi bahsda “Bornmut” safida so‘nggi bor maydonga tushishi kutilmoqda. Angliya Premyer Ligasining 19-turidan o‘rin olgan ushbu uchrashuv 30 dekabr, seshanba kuni bo‘lib o‘tadi.

OAV ma’lumotlariga ko‘ra, Antuan Semenyoning “Bornmut” bilan shartnomasida 65 million funt sterling (taxminan 75 million yevro) miqdoridagi tovon puli belgilangan. Ushbu band faqat 2026 yil 10 yanvargacha amal qiladi. Klub mazkur muddatni ataylab cheklagan, chunki ehtimoliy transferdan so‘ng futbolchining o‘rniga munosib nomzod topish uchun vaqt yutishni rejalashtirgan.

Antuan Semenyo 2023 yil yanvaridan buyon “Bornmut” safida to‘p surib kelmoqda. Shu vaqt davomida u barcha musobaqalar doirasida jami 106 ta uchrashuvda maydonga tushib, o‘z hisobiga 30 ta gol va 13 ta golli uzatma yozdirib qo‘ygan. Futbolchining klub bilan amaldagi shartnomasi 2030 yil yozigacha mo‘ljallangan. Transfermarkt portali ma’lumotlariga ko‘ra, Semenyoning bozor qiymati 65 million yevroni tashkil etadi.