Har qanday soha bo‘lmasin, ayniqsa, sportda albatta yil yakunlariga kelib, qayd etilgan natijalar sarhisob qilinadi. 2025 yilgi mavsum O‘zbekiston futboli uchun yuqori saviyada o‘tdi.

Ayniqsa, O‘zbekiston milliy terma jamoasi hujumchisi Eldor Shomurodovning o‘tgan mavsumdagi natijalari yuqori bo‘ldi.

Xususan, Eldor 2025 yilni Italiyaning «Roma» futbol klubi safida boshladi va jamoa tarkibida barqaror o‘yin namoyish etib, qator muhim uchrashuvlarda hal qiluvchi gollar muallifiga aylandi hamda jamoasining g‘alabalariga munosib hissa qo‘shdi. Aniqroq aytadigan bo‘lsak, Rim klubi safida Shomurodov Yevropa ligasida 4 ta o‘yinda maydonga tushib, 2 ta gol va 1 ta golli uzatmani o‘z hisobiga yozib qo‘ygan bo‘lsa, Italiya A Seriyasida 19 ta uchrashuvda qatnashib, 3 tadan gol va assist qayd etdi.

Yozgi transferlar mavsumida Eldor Shomurodov faoliyatini Turkiyaning «Istanbul Bashakshehir» klubiga o‘tdi. Yangi jamoada hujumchi qisqa vaqt ichida o‘z o‘yinini topib, Turkiya Superligasida 17 ta o‘yinda 12 ta gol va 3 ta assist natija ko‘rsatdi. Ayni damda u chempionatining to‘purarlar ro‘yxatida peshqadamlar qatorida bormoqda.

Darvoqe, Eldor Shomurodov O‘zbekiston milliy terma jamoasi safida 2025 yil davomida 10 ta o‘yin o‘tkazib, 2 ta gol muallifi bo‘ldi.

Qisqa qilib aytganda, Eldor Shomurodov yil davomida jami 58 ta o‘yinda jami 19 ta gol urgan bo‘lsa,  8 ta golli uzatmaga muallif bo‘ldi.  Umid qilamizki, 2026 yilgi futbol mavsumida tajribali futbolchimiz bir qator muvaffaqiyatlarga erishadi va Jahon chempionatida yorqin o‘yinlar namoyish etib, Milliy terma jamoamiz uchun muhim g‘alabalarga o‘z hissasini qo‘shadi.  

Javohir Toshxo‘jayev, O‘zA