Ҳар қандай соҳа бўлмасин, айниқса, спортда албатта йил якунларига келиб, қайд этилган натижалар сарҳисоб қилинади. 2025 йилги мавсум Ўзбекистон футболи учун юқори савияда ўтди.

Айниқса, Ўзбекистон миллий терма жамоаси ҳужумчиси Элдор Шомуродовнинг ўтган мавсумдаги натижалари юқори бўлди.

Хусусан, Элдор 2025 йилни Италиянинг «Рома» футбол клуби сафида бошлади ва жамоа таркибида барқарор ўйин намойиш этиб, қатор муҳим учрашувларда ҳал қилувчи голлар муаллифига айланди ҳамда жамоасининг ғалабаларига муносиб ҳисса қўшди. Аниқроқ айтадиган бўлсак, Рим клуби сафида Шомуродов Европа лигасида 4 та ўйинда майдонга тушиб, 2 та гол ва 1 та голли узатмани ўз ҳисобига ёзиб қўйган бўлса, Италия А Сериясида 19 та учрашувда қатнашиб, 3 тадан гол ва ассист қайд этди.

Ёзги трансферлар мавсумида Элдор Шомуродов фаолиятини Туркиянинг «Истанбул Башакшеҳир» клубига ўтди. Янги жамоада ҳужумчи қисқа вақт ичида ўз ўйинини топиб, Туркия Суперлигасида 17 та ўйинда 12 та гол ва 3 та ассист натижа кўрсатди. Айни дамда у чемпионатининг тўпурарлар рўйхатида пешқадамлар қаторида бормоқда.

Дарвоқе, Элдор Шомуродов Ўзбекистон миллий терма жамоаси сафида 2025 йил давомида 10 та ўйин ўтказиб, 2 та гол муаллифи бўлди.

Қисқа қилиб айтганда, Элдор Шомуродов йил давомида жами 58 та ўйинда жами 19 та гол урган бўлса,  8 та голли узатмага муаллиф бўлди.  Умид қиламизки, 2026 йилги футбол мавсумида тажрибали футболчимиз бир қатор муваффақиятларга эришади ва Жаҳон чемпионатида ёрқин ўйинлар намойиш этиб, Миллий терма жамоамиз учун муҳим ғалабаларга ўз ҳиссасини қўшади.  

Жавоҳир Тошхўжаев, ЎзА