"Espanyol" bosh murabbiyi Manolo Gonsales "Barselona" darvozaboni Joan Garsiyaning o‘tgan derbidagi o‘yinini muhokama qilishdan bosh tortdi.
"Ko‘k-anorranglilar" darvozaboni uchrashuv qahramoniga aylandi va hozirgi jamoasiga sobiq jamoasini mag‘lub etishga yordam berdi (2:0).
- Meni noto‘g‘ri tushunmang, lekin Joan Garsiya haqida gapirmayman. O‘yinoldi izohlarim kontekstdan yulib olindi va derbida adovat qo‘zg‘ash deb talqin qilindi. Mana shuning uchun ham endi o‘zimni tiyishni ma’qul ko‘raman. Bundan tashqari, o‘tgan yili men Garsiyaning "Barselona"ga o‘tishi haqida 50 marta fikr bildirganman. Menimcha, shuning o‘zi yetarli," - dedi Gonsales matbuot anjumanida.
Joan Garsiya 2025 yilning iyunida "Espanyol"ni "Barsa"ga almashtirgandi.
