Yangi mavsumda o‘z oldiga jiddiy maqsadlarni qo‘yayotgan «Andijon» klubi gruziyalik yarim himoyachi Aleksandre Andronikashvilini o‘z tarkibiga qo‘shib oldi.
Andronikashvili 1999 yilning 9 aprel sanasida Gruziyaning Tiflis shahrida tavallud topgan.
U faoliyatini asosan Gruziya chempionatida o‘tkazgan bo‘lib, bungacha «FS 35», «Lokomotiv» (Tbilisi), «Shukura» va «Dila» klublarida to‘p surgan. Futbolchi o‘tgan mavsum «Dila» safida 33 ta o‘yinda maydonga tushdi va 8 ta gol urdi. Jamoasi bilan mamlakat kubogi va Superkubogini qo‘lga kiritdi. Shuningdek, mavsum yakunida Liganing ramziy jamoasidan o‘rin oldi.
Futbolchi xalqaro maydonda ham o‘zini ko‘rsatishga muvaffaq bo‘lgan. U Gruziya U21 terma jamoasi safida Yevropa chempionati saralash uchrashuvlarida ishtirok etib, Fransiya va Shveysariya kabi kuchli futbol maktablariga ega terma jamoalarga qarshi o‘yinlarda maydonga tushgan.
