«Pari Sen-Jermen» klubi hujumchi va «Oltin to‘p» sohibi Usmon Dembele bilan shartnomani uzaytirish bo‘yicha muzokaralarda moliyaviy shartlar bo‘yicha qarama-qarshiliklar tufayli qiyinchilikka uchrayapti, deb xabar berdi RMC Sport.

Manbaga ko‘ra, Parij klubi fransuz futbolchisiga yiliga taxminan 30 million yevro maosh bilan shartnoma taklif qilgan, ammo futbolchi vakillari bu summani qariyb ikki barobar ko‘p — 60 million yevroga yetkazishni talab qilmoqda.

28 yoshli Dembelening amaldagi shartnomasi 2028 yil yoziga qadar amal qiladi. Uning muzokaralardagi pozisiyasi 2024/2025 mavsumidagi muvaffaqiyatlari orqali sezilarli darajada mustahkamlangan: futbolchi shu mavsumda «Oltin to‘p», The Best mukofoti va Chempionlar ligasining eng yaxshi futbolchisi nomini qo‘lga kiritgan. Shu mavsumda PSJ tarixida ilk bor Yevropa klublarining eng asosiy musobaqasida g‘olib chiqdi.

Klub e’tiroficha, Dembele bu muvaffaqiyatda hal qiluvchi rol o‘ynagan, biroq yangi shartnoma tuzishda PSJ rahbariyati maoshlar balansiga e’tibor qaratishi va asosiy oyliklarni keskin oshirishdan qochishi lozim. Parijliklar bonuslar va o‘zgaruvchan to‘lovlar tizimiga tayanmoqda, doimiy oyliklarni katta hajmda oshirishdan voz kechmoqda.

Shu kabi yondashuv avval Janluidji Donnarumma bilan muzokaralarda ham qo‘llanilgan va natijada u PSJni tark etgan hamda «Manchester Siti»ga ko‘chib o‘tgan. Manbaga ko‘ra, shunga o‘xshash ehtiyotkorlik Dembele bilan muzokaralarda ham, shuningdek Vilyan Pacho kabi boshqa asosiy futbolchilarning kelgusi shartnomalari muhokamasida ham qo‘llanilmoqda.