FIFA 2026-yilgi Jahon chempionati uchun chiptalarga bo‘lgan talab juda yuqori ekanini ma’lum qildi. Tashkilot xabariga ko‘ra, turnir uchun 500 milliondan ortiq chipta so‘rovi kelib tushgan. Bu haqda ESPN nashri xabar berdi.

Unga ko‘ra, mezbon davlatlaridan tashqari eng ko‘p so‘rovlar Germaniya, Angliya, Braziliya, Ispaniya, Portugaliya, Argentina va Kolumbiya terma jamoasi muxlislari tomonidan yuborilgan.

Chiptalar savdosining uchinchi bosqichida (11 dekabrdan 13 yanvarga qadar) eng yuqori talab 27 iyun kuni Mayami shahrida bo‘lib o‘tadigan Kolumbiya — Portugaliya uchrashuviga bo‘lgan. Shuningdek, 18 iyun sanasiga belgilangan Meksika va Janubiy Koreya o‘rtasida o‘tkaziladigan bahs, 19 iyul kuni Nyu-Jersida bo‘ladigan final uchrashuvi hamda Meksika — Janubiy Afrika o‘rtasidagi ochilish o‘yini chiptalariga ham qiziqish yuqori bo‘ldi.

FIFA prezidenti Janni Infantino turnir ahamiyatini ta’kidlab, stadionlar barcha muxlislarni sig‘dira olmasligini aytdi va Jahon chempionati doirasida stadiondan tashqari muxlislar uchun monitorlar o‘rnatilishini bildirgan.

Ma’lumot o‘rnida, Jahon chempionati uchun chiqarilgan ayrim toifadagi chiptalar narxi 8 680 dollargacha baholangan. Tanqidlar ortidan FIFA 48 ta federasiya uchun 60 dollarlik chiptalar ajratilishini e’lon qildi. Ushbu chiptalar “o‘z terma jamoasining o‘yinlariga tez-tez tashrif buyuradigan sodiq muxlislarga” berilishi kerak.

Eslatib o‘tamiz, qur’a natijalariga ko‘ra, O‘zbekiston Portugaliya, Kolumbiya hamda qit’alararo pley-off g‘olibi (Kongo – Yamayka/YAngi Kaledoniya) bilan “K” guruhidan joy oldi. Fabio Kannavaro boshchiligidagi jamoa ilk turda Kolumbiyaga qarshi maydonga tushadi. Bu uchrashuvga Meksika poytaxtidagi “Asteka” stadioni mezbonlik qiladi. “Oq bo‘rilar” ikkinchi turda Krishtianu Ronaldu boshchiligidagi Portugaliya bilan o‘ynaydi. Mazkur bellashuv AQSHdagi “NRG” stadionida o‘tadi. O‘zbekistonning guruh bosqichidagi oxirgi o‘yini esa Atlantadagi “Mersedes Benz” stadionda o‘tkaziladi.