FIFA 2026-йилги Жаҳон чемпионати учун чипталарга бўлган талаб жуда юқори эканини маълум қилди. Ташкилот хабарига кўра, турнир учун 500 миллиондан ортиқ чипта сўрови келиб тушган. Бу ҳақда ESPN нашри хабар берди.

Унга кўра, мезбон давлатларидан ташқари энг кўп сўровлар Германия, Англия, Бразилия, Испания, Португалия, Аргентина ва Колумбия терма жамоаси мухлислари томонидан юборилган.

Чипталар савдосининг учинчи босқичида (11 декабрдан 13 январга қадар) энг юқори талаб 27 июнь куни Майами шаҳрида бўлиб ўтадиган Колумбия — Португалия учрашувига бўлган. Шунингдек, 18 июнь санасига белгиланган Мексика ва Жанубий Корея ўртасида ўтказиладиган баҳс, 19 июль куни Нью-Жерсида бўладиган финал учрашуви ҳамда Мексика — Жанубий Африка ўртасидаги очилиш ўйини чипталарига ҳам қизиқиш юқори бўлди.

FIFA президенти Жанни Инфантино турнир аҳамиятини таъкидлаб, стадионлар барча мухлисларни сиғдира олмаслигини айтди ва Жаҳон чемпионати доирасида стадиондан ташқари мухлислар учун мониторлар ўрнатилишини билдирган.

Маълумот ўрнида, Жаҳон чемпионати учун чиқарилган айрим тоифадаги чипталар нархи 8 680 долларгача баҳоланган. Танқидлар ортидан FIFA 48 та федерация учун 60 долларлик чипталар ажратилишини эълон қилди. Ушбу чипталар “ўз терма жамоасининг ўйинларига тез-тез ташриф буюрадиган содиқ мухлисларга” берилиши керак.

Эслатиб ўтамиз, қуръа натижаларига кўра, Ўзбекистон Португалия, Колумбия ҳамда қитъалараро плей-офф ғолиби (Конго – Ямайка/Янги Каледония) билан “K” гуруҳидан жой олди. Фабио Каннаваро бошчилигидаги жамоа илк турда Колумбияга қарши майдонга тушади. Бу учрашувга Мексика пойтахтидаги “Ацтека” стадиони мезбонлик қилади. “Оқ бўрилар” иккинчи турда Криштиану Роналду бошчилигидаги Португалия билан ўйнайди. Мазкур беллашув АҚШдаги “NRG” стадионида ўтади. Ўзбекистоннинг гуруҳ босқичидаги охирги ўйини эса Атлантадаги “Мерседес Бенз” стадионда ўтказилади.