Ispaniyaning La Liga tashkiloti Ispaniya Kubogi 1/8 finali doirasidagi «Real» — «Albasete» uchrashuvi paytida madridliklar vingeri Vinisius Juniorga nisbatan aytilgan irqchilik ruhidagi haqoratlarni keskin qoraladi. Ushbu bahsda «qaymoqranglilar» 2:3 hisobida mag‘lub bo‘lishdi.

«La Liga har qanday irqchilik haqoratlarini qoralaydi. Maydonda ham, undan tashqarida ham nafratga o‘rin yo‘q. Vinisius, La Liga sen bilan. Futbolimiz kuchi — irqchilikka qarshi», — deya ta’kidlanadi tashkilotning ijtimoiy tarmoqlardagi bayonotida.

Avvalroq braziliyalik futbolchi o‘yin oldidan qizish paytida «Albasete» muxlislari tomonidan irqchilik haqoratlariga duch kelgani xabar qilingan edi.

Joriy mavsumda Vinisius klub safida barcha musobaqalarda 28 ta uchrashuv o‘tkazib, 5 ta gol urdi va 8 ta golli uzatma amalga oshirdi.