Испаниянинг Ла Лига ташкилоти Испания Кубоги 1/8 финали доирасидаги «Реал» — «Альбасете» учрашуви пайтида мадридликлар вингери Винисиус Жуниорга нисбатан айтилган ирқчилик руҳидаги ҳақоратларни кескин қоралади. Ушбу баҳсда «қаймоқранглилар» 2:3 ҳисобида мағлуб бўлишди.

«Ла Лига ҳар қандай ирқчилик ҳақоратларини қоралайди. Майдонда ҳам, ундан ташқарида ҳам нафратга ўрин йўқ. Винисиус, Ла Лига сен билан. Футболимиз кучи — ирқчиликка қарши», — дея таъкидланади ташкилотнинг ижтимоий тармоқлардаги баёнотида.

Аввалроқ бразилиялик футболчи ўйин олдидан қизиш пайтида «Альбасете» мухлислари томонидан ирқчилик ҳақоратларига дуч келгани хабар қилинган эди.

Жорий мавсумда Винисиус клуб сафида барча мусобақаларда 28 та учрашув ўтказиб, 5 та гол урди ва 8 та голли узатма амалга оширди.