"Tottenxem" bosh murabbiyi Tomas Frank vaziyatni o‘nglash imkoniyatiga ega bo‘ladi. Daniyalik mutaxassis o‘tgan yilning yozida "shporlar"ni qabul qilib olgandi, ammo uning qo‘l ostidagi natijalar yaxshi emas: Premyer-liganing 21-turidan so‘ng jamoa turnir jadvalida 14-o‘rinni egallab turibdi. Jurnalist Tom Ollonaning ma’lum qilishicha, "Tottenxem" murabbiylar almashinuvidan charchagan, shu bois Frank masalasida "oqilona yo‘l tutish" va "xotirjamlikni saqlash" niyatida.
Tomas Frank davrida jamoaning ahvoli har hafta baholanadi, ammo rahbariyat murabbiy qo‘llab-quvvatlanishni his qilishi uchun hamma narsani qiladi. 52 yoshli mutaxassisga o‘zini ko‘rsatish uchun vaqt beriladi.
