Senegal terma jamoasi hamda Saudiya Arabistonining “An-Nassr” klubi hujumchisi Sadio Mane o‘z tug‘ilib o‘sgan qishloqqa qiymati 500 ming dollarga teng shifoxona qurib berdi. Endilikda ushbu tibbiyot muassasasida mahalliy aholi bepul davolanadi.

Bundan tashqari, Sadio Mane o‘zi tug‘ilib o‘sgan Bambali qishlog‘idagi har bir oilaga har oy 76 dollar (taxminan 100 ming naira) miqdorida moddiy yordam ko‘rsatib keladi. Futbolchi yoshlar uchun grant va stipendiyalar ajratadi, shuningdek, Mane ushbu hudud aholisini bepul internet tarmog‘i va barqaror elektr ta’minoti bilan ham ta’minlagan.

Sadio Mane ushbu holat haqida quyidagicha fikr bildirgan:

“Atrofingdagilar qiynalayotgan bir paytda milliardlarga egalik qilishning hech qanday ma’nosi yo‘q”.

Shuningdek, Senegal terma jamoasi Afrika Millatlar Kubogida g‘alaba qozongan taqdirda, Sadio Mane mukofot pullarining katta qismini xayriya ishlariga yo‘naltirishini ma’lum qilgan.

Ma’lumot uchun, 18 yanvar kuni bo‘lib o‘tgan Afrika Millatlar Kubogi final uchrashuvida Senegal Marokash ustidan 1:0 hisobida g‘alaba qozondi. Sadio Mane boshchiligidagi jamoa oltin medallar bilan birga 10 million dollar miqdoridagi mukofot pulini ham qo‘lga kiritdi.