Xabaringiz bor, mahoratli himoyachi Islombek Mamatkazin yangi mavsumda "Navbahor" sharafini himoya qiladi. Ayni paytda “lochinlar”ning Turkiyadagi o‘quv-mashg‘ulot yig‘inida ishtirok etayotgan futbolchi klub matbuot xizmati uchun maxsus intervyu berdi. Quyida mazkur suhbatni e’tiboringizga havola etyapmiz.

- Islombek, Turkiyadagi mashg‘ulotlar qanday kechyapti?
- Juda yaxshi kechyapti. Shuningdek, bu yerdagi yig‘in davomida bir qator nazorat bahslari o‘tkazishni ham rejalashtirganmiz.

- “Navbahor”ga o‘tishingiz qanday yuz berdi?
- Bu qarorga kelishimga Timur Tohirovich Kapadzedan ko‘p narsa o‘rganish mumkinligi turtki berdi. Futbolchi sifatida yanada o‘sishim, rivojlanishim uchun Timur Tohirovichning qo‘l ostida mashg‘ulotlar o‘tkazish, o‘ynash ko‘p yordam beradi, degan umidda  “Navbahor” safiga qo‘shildim.

- Jamoamizning ko‘plab mashg‘ulotlarida ham qatnashdingiz, yangi muhit sizda qanday taasurot qoldirmoqda?

- “Navbahor” tarkibiga qo‘shilib, mashg‘ulotlarga kirishdim. Taassurotlar yaxshi. Jamoadagi ko‘plab futbolchilar bilan do‘stmiz, muhit esa kutganimdek, a’lo darajada.

- Siz vodiyni bir jamoasidan boshqa jamoasiga o‘tdingiz. Avvalgi mavsumlarda “Navbahor”ga qarshi kechgan ko‘plab “vodiy derbilari”da maydonga tushgansiz. Endi navbatdagi derbilarni qanday tasavvur etyapsiz?
- To‘g‘ri, “vodiy derbilari”da ko‘p qatnashganman. Derbi o‘z nomi bilan derbi va bunday o‘yinlar qachon hamda qayerda bo‘lmasin, qiziqarli va murosasiz tarzda kechgan. Bu yilgi “vodiy derbilari” esa avvalgilaridan ham qiziqroq o‘tishiga shubha yo‘q. Boisi, joriy yilda vodiy jamoalarining o‘z oldiga yuqori maqsadni qo‘yayotgani bo‘lajak derbilarning jangovar hamda olovli  tarzda kechishidan dalolat bermoqda.

- Nechanchi raqamni yoqtirasiz va “Navbahor”da nechanchi raqamda o‘ynamoqchisiz?
- Menga 4-raqam yoqadi hamda “Navbahor”da ham ushbu raqam ostida to‘p tepish niyatidaman.

- Kelajakdagi orzu va rejalaringiz?
- “Navbahor” bilan sovrinlar yutish niyatidaman. Nasib etsa, barchasiga mehnatlarimiz orqali erishamiz.

- Faoliyatingiz davomida sizga ko‘p tashvish tug‘dirgan, zararsizlantirish qiyin bo‘lgan hujumchi kim?
- Faoliyatimdagi eng noqulay hujumchi bu Moskvaning SSKA jamoasi forvardi Anton Zabolotniy bo‘lgan. Moskvaliklarga qarshi o‘rtoqlik o‘yini o‘tkazganimizda Zabolotniyga qarshi o‘ynashda ancha qiynalganman. Uning mahorati va darajasi ancha yuqori ekanligi, o‘zgacha darajadagi futbolchi ekanligi bilingandi.

- Mabodo sizga tanlash imkoniyati berilganida, “Navbahor”ga qaysi futbolchini taklif qilardingiz?
- Endi o‘yinchilarni taklif qilish bizga bog‘liq emas-ku, lekin shunaqa tanlov imkoniyati tug‘ilib qolsa, albaniyalik hujumchi Rubin Hebayni tanlagan bo‘lar edim. U bilan “Andijon”da birga o‘ynaganmiz hamda Hebayning imkoniyatlarini juda yaxshi bilaman va bu “Navbahor”ning yanada kuchayishiga yordam beradi, deb o‘ylayman.