Myunxenning "Bavariya" klubi 30 yoshli hujumchisi Serj Gnabri klub bilan shartnomani uzaytirishga yaqin turibdi.

Aytish joizki, Gnabri bilan mehnat shartnomasi yaqin orada uzaytirilishi haqidagi mish-mishlar o‘tgan yildan beri davom etmoqda.

Biroq jurnalist Florian Plettenbergning ta’kidlashicha, hammasi rejadagidek ketmoqda. Uning ma’lumotiga ko‘ra, yangi shartnoma imzolanishi haqiqatan ham biroz cho‘zilmoqda, biroq u keyingi haftadayoq amalga oshishi kerak. "Bavariya" Gnabrining o‘yinlaridan to‘liq qoniqish hosil qilmoqda va uni yaqin kelajakda jamoa yetakchisi sifatida ko‘rmoqda.

Joriy mavsumda Gnabri barcha turnirlarda 23 ta uchrashuvda maydonga tushib, 7 marta raqiblar darvozasini ishg‘ol qildi va 8 ta golli uzatmani amalga oshirdi.

Nemisning "Bavariya" bilan amaldagi shartnomasi 2026 yilning yozida o‘z nihoyasiga yetadi.