WBO va IBF yo‘nalishlarida Jahon chempioni bo‘lgan Jonibek Alimxanulining “B” doping namunasi ham ijobiy natija ko‘rsatdi. Bu haqda Qozog‘iston professional boks federasiyasi prezidenti Rahimjan Erdenbekov ma’lum qildi.

“Yaqinda Jahon antidoping agentligi (WADA) tomonidan yuborilgan 34 betlik yakuniy ekspertiza xulosasini oldik. Ha, “B” namunasi tasdiqlandi. Hozir asosiy savol — sportchi taqiqlangan moddani ongli ravishda qabul qilganmi yoki u organizmga boshqa yo‘l bilan tushib qolganmi. Hozircha shu savol ochiq qolmoqda”, dedi Erdenbekov.

Mazkur vaziyatga bokschining menejeri Berik Sultan ham munosabat bildirdi. Uning ta’kidlashicha, hatto diskvalifikasiya qo‘llaniladigan bo‘lsa ham, Jonibek ringga qaytadi.

“Bizning karyeramizga nuqta qo‘yayotganlar adashmoqda. Hozircha Jonibek chetlatilmagan va u hamon chempion. Rasmiy qaror e’lon qilingach, keyingi qadamlar belgilanadi. Agar yarim yil yoki bir yilga diskvalifikasiya bo‘lsa ham, biz qaytamiz. Jonibek hozir 33 yoshda, oldinda hali ko‘p imkoniyatlar bor. “Kazakh Style” yana ringda porlaydi”, dedi Sultan.

Ma’lumot uchun, avvalroq Alimxanulining doping testidan o‘ta olmagani va uning tahlillarida meldoniy moddasi aniqlangani haqida xabar qilingandi. Shu sababli 7 dekabr kuni AQSHning San-Antonio shahrida bo‘lib o‘tishi kerak bo‘lgan, kubalik Erislandi Laraga qarshi o‘rta vazn (72,6 kg) toifasidagi jang bekor qilingan edi.