«Real»ning yangi bosh murabbiyi Alvaro Arbeloa Xabi Alonso davrida qo‘llanilgan jamoa mashg‘ulotlariga yondashuvni o‘zgartirishga qaror qildi.

Endi «qaymoqranglilar» futbolchilari Chempionlar ligasidagi safar o‘yinlari oldidan mashg‘ulotlarni raqib jamoa mamlakati hududida o‘tkazadi. Bu haqda Marca xabar bermoqda.

Manba ma’lumotlariga ko‘ra, yangi tamoyilni amalga oshirish zudlik bilan boshlanadi. Seshanba kuni, 27 yanvar tongida madridliklar Chempionlar ligasining 8-turi doirasida «Benfika»ga qarshi uchrashuv uchun Lissabonga yo‘l oladi va kunning ikkinchi yarmida «Da Lush» stadionida yakuniy mashg‘ulotni o‘tkazadi.

Qayd etilishicha, Alonso «Madrid»ning o‘yin oldidan mashg‘ulotlarini Madridda o‘tkazishni afzal ko‘rar, raqib stadionida esa faqat o‘yinda ishtirok etar edi.