"Yuventus" vingeri Fransishku Konseysau Portugaliya terma jamoasidagi sherigi Krishtianu Ronaldu klub haqida nima deganini aytdi.
"An-Nasr"ning hozirgi hujumchisi 2018-2021 yillarda turinliklar sharafini himoya qilgan. Konseysau "keksa sinyora" safiga 2024 yilning yozida "Portu"dan ijara asosida qo‘shilgan va bir yildan so‘ng sotib olingan.
"Yuventus"ga kelishdan oldin Krishtianu bilan gaplashmaganman, ammo terma jamoa qarorgohida bo‘lib o‘tgan uchrashuvimizdagi so‘zlarini eslayman. Uning aytishicha, "Yuventus" - doimiy g‘alabalar va har bir futbolchidan maksimal darajada o‘zini bag‘ishlashni talab qiladigan ulkan klub. Aynan shu darajada o‘ynashni istayman, bu menga yoqadi," - deya Konseysauning intervyusidan iqtibos keltiradi Italiya OAV.
