Qishki transfer bozorida «Atletiko»ning asosiy maqsadi — yarim himoyachi Leon Goreska. Madrid klubi Germaniya terma jamoasi a’zosida Konor Gallaxer o‘rnini bosishi mumkin bo‘lgan futbolchini ko‘rmoqda.
«Goreska — Diyego Simeone va Mateu Alemani uchun orzu qilingan maqsad», — deb yozdi Sky Germany jurnalisti Florian Plettenberg.
Qayd etilishicha, «Atletiko» va Goreska o‘rtasida allaqachon to‘g‘ridan-to‘g‘ri muzokaralar bo‘lib o‘tgan. Yangi bosqich chorshanba kuni o‘tkazilgan. «Matraschilar» loyihasi Leonni qiziqtirmoqda. Uning oldida ikki variant bor — yaqin kunlardayoq Madridga ko‘chib o‘tish yoki mavsumni «Bavariya»da yakunlash. Qaror 24 soat ichida qabul qilinishi kerak.
30 yoshli Goreskaning «Bavariya» bilan amaldagi shartnomasi joriy mavsum oxiriga qadar mo‘ljallangan.
