Қишки трансфер бозорида «Атлетико»нинг асосий мақсади — ярим ҳимоячи Леон Горецка. Мадрид клуби Германия терма жамоаси аъзосида Конор Галлахер ўрнини босиши мумкин бўлган футболчини кўрмоқда.
«Горецка — Диего Симеоне ва Матеу Алемани учун орзу қилинган мақсад», — деб ёзди Sky Germany журналисти Флориан Плеттенберг.
Қайд этилишича, «Атлетико» ва Горецка ўртасида аллақачон тўғридан-тўғри музокаралар бўлиб ўтган. Янги босқич чоршанба куни ўтказилган. «Матрасчилар» лойиҳаси Леонни қизиқтирмоқда. Унинг олдида икки вариант бор — яқин кунлардаёқ Мадридга кўчиб ўтиш ёки мавсумни «Бавария»да якунлаш. Қарор 24 соат ичида қабул қилиниши керак.
30 ёшли Горецканинг «Бавария» билан амалдаги шартномаси жорий мавсум охирига қадар мўлжалланган.
