2026-yilgi Osiyo Kubogiga hozirlik ko‘rayotgan Kotrina Kulbite boshqaruvidagi O‘zbekiston ayollar terma jamoasi Vyetnam poytaxti Xanoy shahrida o‘tkazilgan navbatdagi nazorat uchrashuvida maydonga tushdi va mezbonlar ustidan 6:2 hisobida g‘alaba qozondi.

Uchrashuv davomida O‘zbekiston terma jamoasi hujumda faol harakat qildi va ikkinchi bo‘limda raqib darvozasiga ketma-ket gollar kiritdi. Jamoaning eng samarali futbolchisi Lyudmila Karachik bo‘lib, u 52-, 70- va 75-daqiqalarda gol urib, xet-trikka erishdi. Shuningdek, Dilrabo Asadova (81-daqiqa), Maftuna Shoyimova (87-daqiqa) va Omina Valixonova (90+2) ham raqib darvozasini ishg‘ol etdi.

Ma’lumot uchun, jamoalar o‘rtasidagi ilk nazorat uchrashuvida Vetnam ayollar terma jamoasi 1:0 hisobida g‘alaba qozongan edi.

2026-yilgi ayollar o‘rtasidagi Osiyo Kubogi 1–21-mart kunlari Avstraliyada bo‘lib o‘tadi. Turnir 2027-yilda Braziliyada o‘tkaziladigan FIFA ayollar o‘rtasidagi Jahon chempionati uchun Osiyo mintaqasidagi yakuniy saralash bosqichi vazifasini bajaradi.