2026-йилги Осиё Кубогига ҳозирлик кўраётган Котрина Кулбите бошқарувидаги Ўзбекистон аёллар терма жамоаси Вьетнам пойтахти Ханой шаҳрида ўтказилган навбатдаги назорат учрашувида майдонга тушди ва мезбонлар устидан 6:2 ҳисобида ғалаба қозонди.
Учрашув давомида Ўзбекистон терма жамоаси ҳужумда фаол ҳаракат қилди ва иккинчи бўлимда рақиб дарвозасига кетма-кет голлар киритди. Жамоанинг энг самарали футболчиси Людмила Карачик бўлиб, у 52-, 70- ва 75-дақиқаларда гол уриб, хет-трикка эришди. Шунингдек, Дилрабо Асадова (81-дақиқа), Мафтуна Шойимова (87-дақиқа) ва Омина Валихонова (90+2) ҳам рақиб дарвозасини ишғол этди.
Маълумот учун, жамоалар ўртасидаги илк назорат учрашувида Ветнам аёллар терма жамоаси 1:0 ҳисобида ғалаба қозонган эди.
2026-йилги аёллар ўртасидаги Осиё Кубоги 1–21-март кунлари Австралияда бўлиб ўтади. Турнир 2027-йилда Бразилияда ўтказиладиган ФИФА аёллар ўртасидаги Жаҳон чемпионати учун Осиё минтақасидаги якуний саралаш босқичи вазифасини бажаради.
