Turkiya Superligasining 20-turidan o‘rin olgan “Bashakshehir” hamda “Rizespor” o‘rtasidagi bahs yakuniga yetdi. 31 yanvar, shanba kuni bo‘lib o‘tgan uchrashuvda 2:2 hisobidagi durang natija qayd etildi.

Uchrashuvdagi hisob 19-daqiqada o‘zbekistonlik hujumchi Eldor Shomurodov tomonidan ochildi. Mazkur gol Shomurodov uchun Turkiya Superligasining joriy mavsumidagi 14-goli bo‘ldi. U to‘purarlar jadvalidagi yetakchiligini yanada mustahkamladi.

45+1-daqiqada “Rizespor” futbolchisi Taha Shahin hisobni tenglashtirdi. Ikkinchi bo‘limning 68-daqiqasida Valentin Miheyle gol urib, mehmonlarni hisobda oldinga olib chiqdi. 75-daqiqada esa “Bashakshehir” futbolchisi Bergyut Ozgyur muvozanatni tikladi. Mazkur natija o‘yin yakuniga qadar o‘zgarmadi.

Shu tariqa, “Bashakshehir” Turkiya chempionatining 20-turida durang qayd etdi. Istanbul klubi hozirda 30 ochko bilan turnir jadvalida 6-o‘rinni egallab turibdi. “Rizespor” esa 20 ochko bilan 11-o‘rindan joy olgan.

“Bashakshehir” safida harakat qilayotgan O‘zbekiston milliy terma jamoasi futbolchilari uchrashuvni asosiy tarkibda boshladi. Eldor Shomurodov to‘liq maydonda harakat qilgan bo‘lsa, Abbosbek Fayzullayev 63-daqiqada zaxiraga olindi.

Ma’lumot uchun, “Rizespor” safida o‘zbekistonlik himoyachi Husniddin Aliqulov ham faoliyat yuritadi. Aliqulov 2026 yil 19 yanvar kuni “Gyoztepe”ga qarshi uchrashuvda olgan zarbasi oqibatida chap tizzasidan jarohat olgan va o‘yinni davom ettira olmagan. Ma’lumotlarga ko‘ra, Husniddin Aliqulovning maydonga qaytishi 6 oydan 9 oygacha vaqt olishi kutilmoqda.

Turkiya Superligasi, 20-tur
“Bashakshehir” — “Rizespor” 2:2
Gollar: 1:0 — Shomurodov (19), 1:1 — Shahin (45+1), 1:2 — Miheyle (68), 2:2 — Ozgyur (75)