Туркия Суперлигасининг 20-туридан ўрин олган “Башакшеҳир” ҳамда “Ризеспор” ўртасидаги баҳс якунига етди. 31 январь, шанба куни бўлиб ўтган учрашувда 2:2 ҳисобидаги дуранг натижа қайд этилди.

Учрашувдаги ҳисоб 19-дақиқада ўзбекистонлик ҳужумчи Элдор Шомуродов томонидан очилди. Мазкур гол Шомуродов учун Туркия Суперлигасининг жорий мавсумидаги 14-голи бўлди. У тўпурарлар жадвалидаги етакчилигини янада мустаҳкамлади.

45+1-дақиқада “Ризеспор” футболчиси Таҳа Шаҳин ҳисобни тенглаштирди. Иккинчи бўлимнинг 68-дақиқасида Валентин Миҳейле гол уриб, меҳмонларни ҳисобда олдинга олиб чиқди. 75-дақиқада эса “Башакшеҳир” футболчиси Бергют Озгюр мувозанатни тиклади. Мазкур натижа ўйин якунига қадар ўзгармади.

Шу тариқа, “Башакшеҳир” Туркия чемпионатининг 20-турида дуранг қайд этди. Истанбул клуби ҳозирда 30 очко билан турнир жадвалида 6-ўринни эгаллаб турибди. “Ризеспор” эса 20 очко билан 11-ўриндан жой олган.

“Башакшеҳир” сафида ҳаракат қилаётган Ўзбекистон миллий терма жамоаси футболчилари учрашувни асосий таркибда бошлади. Элдор Шомуродов тўлиқ майдонда ҳаракат қилган бўлса, Аббосбек Файзуллаев 63-дақиқада захирага олинди.

Маълумот учун, “Ризеспор” сафида ўзбекистонлик ҳимоячи Ҳусниддин Алиқулов ҳам фаолият юритади. Алиқулов 2026 йил 19 январь куни “Гёзтепе”га қарши учрашувда олган зарбаси оқибатида чап тиззасидан жароҳат олган ва ўйинни давом эттира олмаган. Маълумотларга кўра, Ҳусниддин Алиқуловнинг майдонга қайтиши 6 ойдан 9 ойгача вақт олиши кутилмоқда.

Туркия Суперлигаси, 20-тур
“Башакшеҳир” — “Ризеспор” 2:2
Голлар: 1:0 — Шомуродов (19), 1:1 — Шаҳин (45+1), 1:2 — Миҳейле (68), 2:2 — Озгюр (75)