Madridning “Real” klubi Yevropa Chempionlar ligasining umumiy guruh bosqichida 9,2 million yevro miqdoridagi mukofotdan quruq qoldi. “Liverpul”, “Manchester Siti” va “Benfika”ga qarshi uchrashuvlardagi mag‘lubiyatlar sabab “qirollik klubi” 6,3 million yevrodan mahrum bo‘ldi.

Qayd etilishicha, so‘nggi turda turnir jadvalida uchinchi o‘rindan to‘qqizinchi pog‘onaga tushib ketgani oqibatida “Real” yana 1,9 million yevro yo‘qotdi. Natijada “qirollik klubi” 1/8 finalga to‘g‘ridan-to‘g‘ri yo‘llanma uchun beriladigan 2 million yevro o‘rniga, pley-off (saralash) bosqichiga chiqqani uchun atigi 1 million yevro mukofot puli oldi.

Manbaga ko‘ra, agar Ispaniya grandi 1/8 final yo‘llanmasi uchun o‘tkaziladigan pley-off bosqichidayoq musobaqani tark etsa, u holda klub yana 11 million yevrodan ayrilishi mumkin. Shu bilan birga, umumiy bosqich yakunlariga ko‘ra “Real” 39 million yevro daromad olgan.

Pley-off bosqichida “qirollik klubi” Portugaliyaning “Benfika” jamoasiga qarshi maydonga tushadi. Agar jamoa ushbu uchrashuvda g‘alaba qozonsa, 1/8 finalda “Sporting” yoki “Manchester Siti” bilan to‘qnash keladi.