Мадриднинг “Реал” клуби Европа Чемпионлар лигасининг умумий гуруҳ босқичида 9,2 миллион евро миқдоридаги мукофотдан қуруқ қолди. “Ливерпуль”, “Манчестер Сити” ва “Бенфика”га қарши учрашувлардаги мағлубиятлар сабаб “қироллик клуби” 6,3 миллион евродан маҳрум бўлди.
Қайд этилишича, сўнгги турда турнир жадвалида учинчи ўриндан тўққизинчи поғонага тушиб кетгани оқибатида “Реал” яна 1,9 миллион евро йўқотди. Натижада “қироллик клуби” 1/8 финалга тўғридан-тўғри йўлланма учун бериладиган 2 миллион евро ўрнига, плей-офф (саралаш) босқичига чиққани учун атиги 1 миллион евро мукофот пули олди.
Манбага кўра, агар Испания гранди 1/8 финал йўлланмаси учун ўтказиладиган плей-офф босқичидаёқ мусобақани тарк этса, у ҳолда клуб яна 11 миллион евродан айрилиши мумкин. Шу билан бирга, умумий босқич якунларига кўра “Реал” 39 миллион евро даромад олган.
Плей-офф босқичида “қироллик клуби” Португалиянинг “Бенфика” жамоасига қарши майдонга тушади. Агар жамоа ушбу учрашувда ғалаба қозонса, 1/8 финалда “Спортинг” ёки “Манчестер Сити” билан тўқнаш келади.













