«Barselona» prezidenti Joan Laporta jamoaning hujumkor yarim himoyachisi Fermin Lopes bilan shartnoma uzaytirilgani borasida fikr bildirdi.

«Fermin — favqulodda iqtidorga ega yigit. U bolaligidanoq futbol formasida o‘zini boshqalardan farqli ravishda his qila oladi, bosh murabbiy Xans-Diter Flik esa u haqida har doim katta hurmat va zavq bilan gapiradi. Uning shartnomasi 2031 yilgacha uzaytirilgani — ajoyib yangilik. Bu “Barselona” sport direktori Deku uchun katta yutuq. U hozirgi kun va kelajak uchun ishlayapti. Shu qishki transfer oynasida aynan uning ishi samarasida futbolchilar transferidan 9 mln yevro mablag‘ ham qo‘lga kiritdik», — deya Laportaning so‘zlarini keltiradi Mundo Deportivo.

Yarim himoyachi «Barselona» tarbiyalanuvchisi hisoblanadi. U kataloniyaliklar klubiga 13 yoshida «Betis» akademiyasidan kelib qo‘shilgan. Asosiy jamoa safida Lopes barcha musobaqalarda 114 ta o‘yinda maydonga tushib, 29 ta gol va 22 ta golli uzatma muallifi bo‘lgan. Transfermarkt portali ma’lumotlariga ko‘ra, futbolchining bozor qiymati € 70 mlnni tashkil qiladi.