O‘zbekiston MTJ safida yanvar oyidagi o‘quv-yig‘in mashg‘ulotlarida ishtirok etib, ikkita uchrashuvda ikkita gol urishga erishgan Javohir Husanov terma jamoamizga chaqiruvi, terma jamoa bosh murabbiyi va o‘yinlar haqida «Qo‘qon-1912» jamoasining matbuot xizmatiga qisqa intervyu berdi.

— Javohir, avvalo O‘zbekiston MTJdagi debyutingiz bilan tabriklaymiz. Birinchi navbatda terma jamoaga chaqirilishingizni qanchalik kutgandingiz?

— Avvalambor assalomu alaykum! Ochig‘ini aytganda, O‘zbekiston terma jamoasiga chaqiruv olishimni kutmagandim. Birinchi marta mamlakatimizning bosh terma jamoasiga chaqiruv olganimdan xursandman. Bu men uchun katta motivasiya bo‘ldi.

— Terma jamoa libosini kiyganingizda qanday his-tuyg‘ular o‘tdi?

— Mamlakatimizning bosh jamoasi libosini kiyish har bir futbolchining orzusi va maqsadi bo‘lsa kerak. Libosni kiyganingizdan keyin bunga munosib bo‘lish uchun harakat qilasiz. Vatan libosida siz katta mas’uliyatni his qilasiz.

— Fabio Kannavaro haqida nima deya olasiz? Ushbu murabbiy mahalliy murabbiylardan qay jihatlari bilan ajralib turadi?

— To‘g‘risini aytganda, mister Kannavaro juda kuchli murabbiy ekan. Ushbu yig‘inda asosan raqibni pressing qilish bo‘yicha juda ko‘p ishlar olib borildi. Har bir murabbiyning o‘z uslubi va yo‘nalishi bor. O‘zbekiston MTJ bosh murabbiyining talabchanligini alohida ta’kidlab o‘tishim lozim.

— 2 ta o‘yin va 2 ta gol. Terma safidagi o‘yiningiz haqida nima deya olasiz?

— Har ikki bahsda ham maydonga tushib, har ikkalasida ham gol urganimdan juda xursandman. Avval aytganimdek, terma jamoaga chaqiruv har bir futbolchining orzusi. Agar futbolchi bosh terma jamoaga chaqiruv olib, yana debyutida gol ursa, uning baxti yuz barobar oshib ketadi. Hech bir futbolchi o‘z o‘yinidan hech qachon to‘liq qoniqish hosil qilmaydi. Men ham yanada ko‘proq ishlab, vatanim uchun borimni berishga harakat qilaman.