Niderlandiyaning Veyk-an-Zee shahrida shaxmat bo‘yicha 2026 yilgi Tata Steel Chess turniri yakuniga yetdi. Musobaqaning umumiy sovrin jamg‘armasi 1,2 million AQSH dollarini tashkil etadi.
O‘zbekistonlik grossmeyster Nodirbek Abdusattorov Masters guruhi doirasidagi 13-tur uchrashuvida hindistonlik Arjun Erigaisi ustidan g‘alaba qozondi. Ushbu natijadan so‘ng Abdusattorov ochkolari sonini 9 taga yetkazib, turnir jadvalida yakka peshqadam sifatida birinchi o‘rinni egalladi va chempionlikni qo‘lga kiritdi.
Ma’lumot uchun, Nodirbek Abdusattorov avvalgi yillarda ham Tata Steel Chess turnirida sovrinli o‘rinlarni egallab kelgan: 2023 yilda ikkinchi o‘rin, 2024 va 2025 yillarda esa uchinchi o‘rin bilan kifoyalangan edi. 2026 yilda esa uzoq kutilgan chempionlikni qo‘lga kiritdi.
Tata Steel Chess musobaqasida ilk marta ishtirok etgan Javohir Sindarov esa 2-o‘rinni egalladi. Hamyurtimiz bugun 13-tur doirasida chexiyalik Nguyen Tay Day Vanga qarshi qora donalarda o‘ynadi. 83 ta yurishga cho‘zilgan bahsda Javohir raqibini mag‘lub etdi. Sindarov 13 ta o‘yinda 8,5 ochko jamg‘arib, yaqin ta’qibchilaridan 1 ochkoga ilgarilab ketdi.
Turnirda 3-o‘rinni mezbon shaxmatchi Yorden van Foreestga nasib etdi — 7,5 ochko.
