Нидерландиянинг Вейк-ан-Зее шаҳрида шахмат бўйича 2026 йилги Tata Steel Chess турнири якунига етди. Мусобақанинг умумий соврин жамғармаси 1,2 миллион АҚШ долларини ташкил этади.
Ўзбекистонлик гроссмейстер Нодирбек Абдусатторов Masters гуруҳи доирасидаги 13-тур учрашувида ҳиндистонлик Аржун Эригаиси устидан ғалаба қозонди. Ушбу натижадан сўнг Абдусатторов очколари сонини 9 тага етказиб, турнир жадвалида якка пешқадам сифатида биринчи ўринни эгаллади ва чемпионликни қўлга киритди.
Маълумот учун, Нодирбек Абдусатторов аввалги йилларда ҳам Tata Steel Chess турнирида совринли ўринларни эгаллаб келган: 2023 йилда иккинчи ўрин, 2024 ва 2025 йилларда эса учинчи ўрин билан кифояланган эди. 2026 йилда эса узоқ кутилган чемпионликни қўлга киритди.
Tata Steel Chess мусобақасида илк марта иштирок этган Жавоҳир Синдаров эса 2-ўринни эгаллади. Ҳамюртимиз бугун 13-тур доирасида чехиялик Нгуен Тай Дай Ванга қарши қора доналарда ўйнади. 83 та юришга чўзилган баҳсда Жавоҳир рақибини мағлуб этди. Синдаров 13 та ўйинда 8,5 очко жамғариб, яқин таъқибчиларидан 1 очкога илгарилаб кетди.
Турнирда 3-ўринни мезбон шахматчи Йорден ван Фореестга насиб этди — 7,5 очко.
