O‘zbekiston terma jamoasi himoyachisi Abduqodir Husanov Angliya Premyer Ligasining 21-turidan o‘rin olgan “Tottenhem” — “Manchester Siti” uchrashuvida (2:2) asosiy tarkibda maydonga tushib, to‘liq 90 daqiqa harakat qildi.

Uchrashuv davomida Husanov 73 marta to‘p bilan muomala qildi. Himoyachi jami 58 ta uzatma amalga oshirgan bo‘lib, ularning 56 tasi aniq manzilga yetib bordi — 97 foiz aniqlik. Sofascore portali o‘zbekistonlik futbolchining harakatlarini 6,8 ball bilan baholadi. Bu “shaharliklar” himoya chizig‘ida harakat qilgan futbolchilar ichidagi eng yaxshi ikkinchi ko‘rsatkich hisoblanadi. Shuningdek, Husanov uchrashuvning 21-daqiqasida sariq kartochka bilan jazolanganini ham aytib o‘tish lozim.

Abduqodir Husanovning himoyadagi harakatlari:

Himoyaviy harakatlar: 9 marta
Faol kurash orqali to‘pni olib qo‘yish: 2 marta (barchasi muvaffaqiyatli)
Raqib zarbasini to‘sib qolish: 1 marta
Tozalashlar: 6 marta
Yerda kurashlar: 5 marta (3 tasi muvaffaqiyatli)
Havodagi kurashlar: 1 marta

“Tottenhem” hujumchisi Dominik Solanke bahsning eng yaxshi futbolchisi deb topildi — 9,1 ball. Angliyalik futbolchi 70-daqiqada “chayon” uslubida gol urib, jamoasini mag‘lubiyatdan saqlab qoldi.

“Manchester Siti” safida eng yuqori baho tayanch yarim himoyachi Rodriga nasib etdi — 8,3 ball. Avtogol muallifi Mark Gexi hamda “Siti”ning birinchi goliga mualliflik qilgan Rayan Sherki ham 8,1 ball bilan eng yaxshilar qatoridan joy oldi. Shuningdek, Bernardu Silva 7,2 ball, Antuan Semenyo va Abduqodir Husanov 6,8 ball, Niko O'Reyli 6,6 ball, Erling Holand 6,6 ball Rayan Ait-Nuri 6,3 ball hamda Mateus Nunyes 6,0 ball bilan baholandi.